dcsimg
English Site French Site Spanish Site Russian Site Arabic Site Chinese Site OHCHR header
Make a donation to OHCHR


 Universal Declaration of Human Rights

PDF version for the language Baoulé/Baule
PDF Version

Baoulé/Baule

Source: Diffusion Multilingue des Droits de l'Homme, France



Sran mmla mun be mεn nun jɔ bolε

Ibo bolε

Kε ɔ fin kε sran kwlakwa i sran bulε ɔ fin blɔlɔ'n ti, kε i sran-mmla ɔ nin sran kwlakwla liε'n sε'n ti, kε isɔ nin ye ɔ nin fɔundi, nanwlε atin, aklunjɔε ba mεn nun'n ti

Kε ɔ fin kε sε be si'a sran-mmla mun, nan sε be bu'a be like fi, i sɔ nin yε ɔ fa sa tεtε yewa'n ba'nti, sangε kε ɔ fin kε be seli kε mεn nga mɔ i nun sran mun be di be fɔundi, mɔ be kwla be kan be klunklo ndε, be kwla be sɔ be klunklo like, mɔ sεkunlε ɔ nin yalε b'a jaso su, i sɔ mεn mɔ be wan sran kundε i dan'n ti

Kε ɔ fin kε i dan lika nin yε le kε ɔ fata kε mmla su awa yε ɔ nian sran-mmla mun be suɔ, kε ɔ ko yo nan b'a mianmian-man sran nan w'a faman ya w'a jaso-man be nga be fa kwlalε nin sran tεtε yolε be fa be tintin i su be wun'n ti

Kε ɔ fin kε like nga ɔ ti kpa dan yεlε mεn mun b'afiεn janvuε kekle diwa'n ti

Kε ɔ fin kε mεn unmuan nun nvle mun be yali be wan be kan be sie su yekun kε be te lafi sran-mmla su dan, sran ɔ ti like dan, ɔ le'a gua, bla nin yasua be sε. Be wan i sɔ'n ti, like nga ba ko yo nan sran mun b'a nyan alaje, nan aklunjɔε w'a ba be wun, fɔundi nun, i sɔ like nin yε be wa yo'n ti

Kε ɔ fin kε nvle nga be wo anyia sɔ nun, be wan be nin like nga be flε, kε "Mεn mun be Bo Yekun Anyia" be bo yekun be bo mandrεn nan sran i fɔndi ɔ nin i sranmmla be kaci ninge mɔ sran kwlakwla i ti wo be bo'n ti

Kε ɔ fin kε nga ɔ ti kpa dan yεlε kε sran mun be ngba be fa be ti be wlε sran-mmla ɔ nin sran-fɔundi be bo'n ti

Anyia Dan wan kε Ndε nga be kεn yε'n, ɔ fata kε ɔ kaci kε like mɔ i dεnman yε sran kwalkwla nian; mεn kwlakwla be kundε be kεn; ɔ ye sɔ nan mεn kwlakwula su sran o, mεn kun i siesielε ninge mun, be bu Ndε Dan nga i akundan cεn kwlakwla, be bo mandrεn ɔ nin sran mun be fluwaklelε, ɔ nin ngwlεlε klelε, be yo man sran mun be dan lika si sran-mmla ɔ nin fɔndi; kε be ko si be kpɔkun be yo blεblε, mεn kun nun o, mεn ngba nun o, man sran mun be ngba be si i sɔ ndε: mεn nga be trannin annuanzε dan i ase be nun sran mun o, be nga be wo i sɔfuε mun be bo'no, ɔ fata kε i sɔ sran mun be ngba be si sran-mmla ɔ nin sran-fɔundi.

Tikle kikli

Sran mun be ngba, kε be wu be ɔ, be ngba be sε, fɔndi nun, sran-mmala nun. Be si akundanbu, be si su ɔ fata kε sran mun be tran'n, be tran aniaan nun tranlε.

Tikle 2

Sran-mmla ɔ nin sran-fɔundi nga ɔ wo Ndε dan nun, sran kwlakwla kwla fa ye iliε; ɔ le'a kε e ti sran nvle ngunmin, kε e wunnεn ti'a kun, e aniεn ti'a kun, e bo lika ti'a kun, e like sɔwa ɔ ti i ngunmin, e politiki angundan ti'a kun, e fin'a lika kun, ɔ le'a kε wie ti sikafuε, wie ti yalεfuε, kε wie mun be osu ti wlengbi, wie mun be osu ti kanga. I kungba yekun, be kwla'a kpaman sran mun be nun be se'akε nga ti bue nga su sran, nga be wun'εn i liε wlε'n kpa, be wun'an mεn nga su ɔ fin ɔ: be kwla'a be se'a sɔ, kanzε sran fin nvle uflε suo, sε nvle sɔ ɔ le i fɔundio, kanze i ti wo mεn uflε i bo o, ɔ nunmεn i ti bo nun tilε o.

Tikle 3

Sran kwalakwla, ɔ fata kε be sεsε i nguan, be wukε i ɔ di i fɔundi, be sεsε ibɔbɔ ba unmuan.

Tikle 4

Be kwla'a be fa-man sran be kaci'a kanga. Sran kanga yolε nin i fatɔ ɔ nin i ninge i fa sɔ mun be yowa, ba tanninnin be ngba be atin.

Tikle5

Be kwla'a be ye'a sran fi like tεtε mun, be wlε-mεn i bisva, be kwla'a be yo-mεn i ninge nga mɔ ɔ ye sran finfin, mɔ ɔ kaci sran kε blo nnεn mun be sa.

Tikle 6

Lika kwlakwla nga sran kun wo, ɔ fata kε be bu i sran, ɔ fin i mmla su.

Tikle 7

Sran mun be ngba be sε mmla mu be nyrun; i sɔ'n ti, ɔ fata kε mmla mun be wutu be su, be ngba. sran kwlakwla, ɔ fata kε be wuke i nan sran nun kpakpawa w'a nyεn-mεn; sran nun kpakpawa ɔ ti kε Ndε nga i gblu tɔwa sa.

Tikle 8

Sran kwmakwla le atin ɔ ko to ibɔbɔinvle su jɔlε difuεmun, sε ɔ fin nan be bu i anunnflin i fɔundi-mmla su, fɔundi-mmla nga be klεli i fluwa nga be flε i kε "mεn i takawa i bo fluwa".

Tikle 9

Be kwla'a be tra-man sran ngbεn sa, be kwla'a be wlε-mεn i bisua, be kwla'a be tu-mεn i mεn kun su ngbεn sa.

Tikle 10

Sε be sanman sran, nαn ndrumun tran nun, ndε nga ti yε be sanman i, ɔ fata kε nzraa nun, nanwlε nun, jɔlε difuε mun, be nga be ti nun-man sran fi bo'n, mɔ be ti nanwlε sran, be yε ɔ fata kε be ken i sɔ ndε liε niɔn: be yε be kwla se kε sε ɔ wo i ndε fε su o, sε kusuman, nzanman mɔ be sanmanin i, ɔ ti atin su o.

Tikle 11

  1. Sran kwla nga b'a sεnmεn i ndε kun ti, kε be nian kan ndε mɔ be nian bu-man, i sɔ fuε'n be kwla'a se'a kε i ndε yo'a fε. A wun kε be kwla be se sɔ, san b'a di jɔlε, be ngba be ngba be nyrun, ato a wlu'a nun, be nga be ko jrεn i sin i ti kplilε b'a jran.
  2. Be kwla-man be bu-man ndε be guε'ε sran kun su; sε ndε ti yε be sεnmεn i, i nun nga ɔ fa ye sa sɔn, mmla wie fi, i nvle liε su mmla o, mεn nun mmla o, be bu'ε i sɔ like liε'n kε ɔ ti like tε. I ng'ɔ wuka su, yεlε kε alamandi nga be fu i, bisua nga be wlε i, be nuan kwla'a tra-man nga be fa be yo i sɔ titi'n

Tikle 12

Be kwla'a be wla-man be nuan sran kun i awlo nun ndε mun be nun ngbεn, i awlo nun ndε i tranwlε, i fluwa nga ɔ klε'n, i fluwa nga be klε i, be kwla'a be kεn'εn i wun ndε ngbεn, be kwla'a be saci i dunman ngbεn. I sɔ ninge liε mun be ti, ɔ fata kε mmla mun be sasa sran kwlakwla.

Tikle 13

  1. Sran kwlakwla ɔ kwla wlanwlan sin, nvle kun nun, lika nga ɔ klɔ kε ɔ tran'n ɔ kwla se kε wa yε n klɔ kε n tran.
  2. Sran kwlakwla ɔ le atin mɔ ɔ jaso nvle kun su kɔ lika nfle; ɔ kwla jaso ibɔbɔ nvle liε'n su, kpɔkun ɔ kwla sε i sin ɔ ba i nvle liε'n nun yekun.

Tikle 14

  1. Sε nvle kun su be kle sran kun yalε, sran sɔ'n ɔ le atin ɔ kɔ mantan nvle ufuε mɔ ɔ kwla sɔ i nun ɔn.
  2. Sangε i sɔ atin liε'n, wɔ nga a ye sa tεtε mɔ ɔ kɔ-man Mεn b'Anyia be ndε liε su'n, wɔ nga a ye i sɔ sa tε mɔ fata kε be sanman wɔ'n, sa kpa, a kwla'a a jrεn-mεen i sɔ atin su kan-man ndε.

Tikle 15

  1. Sran kwlakwla ɔ le atin mɔ ɔ nyen i auliε nvle
  2. Be kwla-man be se-man sran kun kε, ɔ fin andε a le'a auliε nvle wie kun, i sa sɔ ngbεn; kusuman, sε sran kun wan ɔ kaci i auliε nvle, ɔ le atin kaci.

Tikle 16

  1. Kε be ko nyin yasua kun ɔ nin bla kun, be le atin be ja be wun, be taka be awlo; ɔ fata kε ndε kε nvle uflε nun sran, mεn uflε nun sran, like sɔwa wafa uflε sran, ɔ fata kε i sɔ angundan wlu nun. Be aja nun, be nyɔn be sε; be nun kun se'a kε ɔ tin kun su: i blε nga be ja o, kε be titi aja nun o.
  2. A wun kε be ja'n, uun be nyɔn be nuan w'a yekun, be klun klo su.
  3. Awlo bo ɔ ti kε ananganman like sa, yε ɔ ti nvle kun su sa i olui niɔn; ɔ fata kε nvle ɔ nian su kε i nyima sa, kε awa wukε i.

Tikle 17

  1. Sran kwlakwla, i kungba anzε, ɔ nin sran uflε mun anzε, ɔ kwla le i ti bɔ nun like.
  2. Be kwla'a le'a sran fi i ti bo nun like i sanun.

Tikle 18

Sran kwlakwla ɔ le atin mɔ ɔ bu i ti bo nun angundan, ɔ nyεn i klun ndε, ɔ kwla sɔ i like wafa nga ɔ klo i'n; kε ɔ fin i lε kusuman, sε i wan ɔ kaci nan ɔ sɔ like uflε'n, sε i wan ɔ bu akundan uflε'n, ɔ le atin ɔ kaci. Sε i wan i klun akundan liε'n, i like sowa liε'n, sε i wan ɔ bo be jɔ, i ba kungba o, ɔ nin sran uflε mun o, ɔ le atin ɔ bo be jɔ; sε kusu i wan ɔ ye i like aswre nun, ɔ le atin yo. I kwlaa ngɔ'lε, ɔ kwla klε i fluwa nun, ɔ kwla yo like kwlakwla nga fata kε ɔ yo; sran fi kwla'a tannin i atin.

Tikle 19

Sran kwlakwla ɔ le atin ɔ bu i bɔbɔ ti bo nun akundan, ɔ kεn i klun ndε nga i wan ɔ kan'n. I sɔ i sin yεle kε sε ɔ kεn i klun ndε'n, be kwla-man be kle'ε i yalε; i sin nin yεle kε ɔ le atin kundε ndε mun be tilε; i kusuman kwla bo ndε ɔ nin nzεbua mun be jɔ kle sran mun; like kwlakwla nga ɔ kwla fa bo i sɔ jɔlε liε, ɔ fa bo; ɔ nun-man i ti nun kaan kε awε wo nvle mun b'afiεn.

Tikle 20

  1. Sran kwlakwla ɔ le atin ɔ nin sran ufuε mun be ya anyia; ɔ kwla wlu anuanzε nga ɔ ti'a nzaje anuanzε nun.
  2. Be kwla'a be mianmian-man sran kun ɔ wlu-man anuanzε kun nun.

Tikle 21

  1. Sran kwlakwla ɔ le atin mɔ, i bɔbɔ i nvle liε'n su, ɔ tran awa i juman be ti, sε nεn i bɔbɔ trele sa, ɔ kwla yo i janunfuε.
  2. Sran kwlakwla ɔ le atin, nán ndrunmun kan tran nun, mɔ di i bɔbɔ i nvle'n su awa juman.
  3. Nvle kun su i sran unmwah mun, be ye be man nvle sɔ i su gbεngbεn be fangan. I sɔ'n ti, ɔ fata kε be yo manwlε nun vote, nan sran mun be ndε nga ɔ wo be klun, b'afε i sɔ b'a kan vote'n le nuan; kε i nuan ko ju'n, ɔ fata kε ɔ sεn i wun; sran ngba vote o, aswre vote o; i kwlaa nga ɔ yo ɔ, vote i yowa, nαn mianmianlε tran nun, sran kun i klun vote yε ɔ vote ɔ.

Tikle 22

Sran kwlakwla, kε mɔ ɔ ti nvle kun su sran'n, ɔ fata kε ɔ nyan awa sran anwukalεlike, ɔ le awunnyanmblusuε atin, awasranwukalε atin, be nyin su yiyilε ninge atin; i sɔ ninge mun yε be ti sran kwlaa cinjin, be yε be yi sran i sran lika nglo ɔ, be yo i fɔundi-mmla be dan; i sɔ'n fin nvle kun i mandrεn bowa nun, ɔ fin mεn mun be wun wukawa nun, ɔ fin nvle kun i siesiewa nun, ɔ fin nvle kun i nun anyanbewun ninge mun nun.

Tikle 23

  1. Sran kwla ɔ le atin mɔ ɔ di i bɔbɔ i klunklo juman, juman i fa diwa ɔ nin i akatua be ti i klunsu; ɔ fata kε be nian i su, nαn man ɔ tran sa ngbεn kε ɔ nyan-man juman
  2. Sran kwlakwla i juman nga ɔ di, i su sika cε yε ɔ fata kε be mεn i ɔ, ɔ le'a kε sran kun ɔ le i akatua, sran kun ɔ le i akatua
  3. Sran kwlakwla, kε ɔ di juman'a ɔ fata kε i akatua nga be tuε i'n, ɔ ju i bɔbɔ, i yi ɔ nin i mma mun be wun siesielε kε ɔ fata kε sran fa siesie i wun sa. Sε akatua sɔ'n ju-man, awa wuka suɔ ɔ yo ye.
  4. Sran kwlakwla ɔ nin i wiengu mun be kwla be taka jumandilε anuanzε, sran kwlakwla ɔ kwla wlu i sɔ anuanzε liε nun ɔ fa kpli i like nga ɔ lo i i ti.

Tikle 24

Sran kwlakwla, kε ɔ di juman'n, ɔ le atin ɔ lo unmiεn, ɔ le blε wie ɔ ɔ yiyi i nyisu ɔ. ɔ fata kε dɔ nga mɔ ɔ fa di juman, nan ɔ cε ngboko; yε afuε kun nun i blε mɔ ɔ di'a juman, ɔ fata kε be tuε i kalε.

Tikle 25

  1. Sran kwlakwla ɔ fata kε i sa nun yo fε nan w'a kwla w'a ye i wun ayre, w'a kwla w'a siesie i wun, i bɔbɔ nin i yi nin i mma mun, kε ɔ ti kε aliε dilε liε'n, tralε wlawa'n, lawlε'n, be wun ayre yelε'n, blε mɔ ɔ di'a juman'n, mɔ ɔ tɔ tukpakiε'n, sε ɔ kwla'a nun'n, sε ɔ wo angbeti nun'n, sε w'a yo oke'n; sa yalε kwlakwla nga ɔ tɔ i su mɔ i sa nun a wie'n, ɔ fata kε awa wukε i.
  2. Blata ɔ nin ba kangan mun, ɔ le be wukalε liε'n mɔ awa wuka be ɔ. Ba kangan kwlakwla, kanzε be wu be gua su o, kanzε be wu be aja nun o, be kwlakwla ɔ fata kε awa sasa be.

Tikle 26

  1. Sran kwlakwla ɔla atin mɔ be kle i fluwa. Sran fluwa klelε'n, kε ɔ fa ju kε sua blu su'n, sika tualε nun-man nun. ɔ fata kε ba kangan mun be ngba be kɔ suklu, be nun kun le'ε ti kε ɔ kɔ-man. Sukln nga be kle blalε juman nin juman dilε nun, i sɔ suklu'n, ɔ fata kε ɔ tru; suklu dandan mun be nun wlulε i atin, ɔ fata kε be tike man sran kwlakwla; be kpa'a sran mun be nun, sran kun ɔ nin i like liε mɔ ɔ kwla yo ɔ.
  2. ɔ fata kε fluwa klelε ɔ yi sran i sran lika i nglo, ɔ yo man sran mun be bo nyan, ɔ yo man be nyin yi sran-mmla mun ɔ nin fɔundi-mmla nga ɔ ti fɔundi-mmla be bɔ'n. Fluwa klelε ɔ fata kε ɔ yo man ndidiε ba sran mun b'afiεn, ɔ yo man sran mun be yaci sran kun nun ɔ yo i klunklo ninge, man janvuε dilε ɔ ba mεn mun b'afiεn, sran nvle mun b'afiεn, like sɔfuε mun be wafa b'afiεn. Fluwa klelε i kungba yekun, ɔ fata kε ɔ man "Mεn mun be Bo Yekun Anyia" be ninge nga mɔ be yo mɔ alaje ko cɔ mɔn nun.
  3. Siε mun ɔ nin niεn mun, be yε ɔ fata kε be kundε fluwa i klelε wafa nga ɔ nin be mma mun fata ɔ.

Tikle 27

  1. Sran kwlakwla ɔ le atin mɔ, i nvle liε'n su ninge mɔ ɔ ti kε be nyin su yiyiwa ninge, be sa ti ninge, aguin ninge, ɔ le atin ɔ ye i sɔ ninge wie, ɔ le atin ɔ di su wie; ɔ le atin ɔ wuka be yo be nyrun kɔlε ninge mun; afin sε mblusuε fite su, ɔ le atin di wie.
  2. Sran kun, sε ɔ di i be nyrun, kɔlε aguin juman, ɔ klεi fluwa, ɔ di aguin nan sε i duman fite su ɔ, i mblnsnε fite suɔ ɔ ti iliε.

Tikle 28

Sran kwla ɔ le atin ɔ kunde kε sran mun b'afiε, mεn mun b'afiεn ɔ ye flɔlɔɔ, i sɔ nan sran-mmla ɔ nin fɔundi nga be kan be ndε Ndε nga nun, b'a su mma.

Tikle 29

  1. Sran kun, ɔ fata kε ɔ yo like mεn i nvle mɔ i nun yε i bɔbɔ ɔ kwla di i fɔundi, ɔ kwla bo nyan.
  2. Sran i sran-mmla nin i fɔundi su dilε ɔ le'a awieliε uflε, san awieliε nga i nve su mmla mun be sieli kε ɔ fata'a kε sran kun i sran-mmla nin i fɔundi su dilε ɔ tannin sran uflε mun be liε atin. I sɔ nin yε man be kwla fa atin ndεnman kpa su, aunjɔε ɔ ba nvle nga mɔ i su kpεn sielε ɔ wo sran kwlakwla sa nun nun.
  3. Sran-mmla nin fɔundi ng'ɔlε be kwla'a fa-man be yo'a like fi mɔ ɔ kaci i sin si Mεn mun be Bo Yekun Anyia be atin liε'n

Tikle 30

Awa kun, sran akpasua, sran kun, be kwla'a be jran-man dε nga i nun tre ba kun su be se'a kε be le atin mɔ be di juman wie, be yo ninge wie mɔ ɔ ti sran-mmla nin fɔndi nga be wo yε be sakiwa.


Profile


Native Name
None

Total Speakers
2,130,000 (1993)

Usage By Country
Home Speakers: Ivory Coast (especially in the South)

Background
It is spoken by over 2 million people. It has many subgroups but all claim to understand the standard variety. As a language, Baule belongs to the Niger Congo family, Western Sudanic subgroup, Kwa branch.

Received 5/25/1998
Posted 8/26/1998
Checked 11/12/1998